Tobdotáiđupargopáájá: tulkkuu já tuubdâ tobdoid

Pargovyehi: uccâ juávhoin
Pištem: 90 minuttid
Luokah: 3.–6.

Taan pargopittáást kovvejuvvojeh uccâ juávhoin videoh, main olmooš, kii tobdá tiätunáálá, oovdânpuáhtoo kuulmâ tiileest. Ervideh-uv iäráseh, mii tobdoid lii koččâmušâst? Magarijd tobdomeerhâid tij kavnâvetteđ ton toobdon?

Ulmeh:

• tobdoi aicâdem já kieđâvuššâm kreatiivlii pargo puáđusin
• tubdâđ, tulkkuđ já olgospyehtiđ jieijâs já eres-uv ulmui tobdoid
• hárjuttâllâđ sosiaallijd vuáruvaikuttâsâid já koskâvuođâid
• kuorâttâllâđ já árvuštâllâđ jieijâs pargo já oppâm

Tarbâšeh:

• tablet, viättupuhelin teikâ mottoom eres kuvvimpiergâs jyehi uccâ juávkun. Viättupiergâsáin avžuuttuvvoo kevttiđ videoeditistemheiviittâs, tegu iMovie teikâ FilmoraGo.

Pargopitá mudoh

1. Vuáđupargo (20 minuttid)

1. Taavlun lasettuvvojeh uáppei keksim tobdoh.
2. Taavlun lasettuvvojeh uáppei keksim veerbah ađai säänih, moh almotteh porgâm.
3. Taavlust väljejuvvojeh ohtâ tobdo já ohtâ verbâ. Uánihis tile čaittâluvvoo uccâ juávhust teikâ ubâ luokkain.

Ovdâmerkkâ: Tobdon väljejuvvoo ”soro” já verbân ”purâdiđ”. Tastmaŋa čaittâluvvoo tile: Maht sorolâš olmooš puurâd? Hárjuttâs kiärdoo jieškote-uvlágánij tobdoiguin já verbâiguin.

2. Vuávám (20 minuttid)

Luokka juáhhoo 4–6 uáppee juávhoid. Juávhuh väljejeh olssis oovtâ tobdo já kulmâ veerbâ. Tobdo já verbâ ovtâstittojeh maht-koččâmuššáin: maht olmooš, kii tobdá väljejum náálá, parga väljejum aašijd.

Ovdâmerkkâ: Juávkku väljee tobdon ”soro” já verbân ”väzziđ”, ”sárnuđ” já ”uástiđ njálgáid”. Tain ráhtojeh kulmâ koččâmuš:

• Maht sorolâš olmooš vázzá?
• Maht sorolâš olmooš sárnu?
• Maht sorolâš olmooš uástá njálgáid?

3. Kuvviimeh (30 minuttid)

Jyehi tiileest/koččâmušâst kovvejuvvoo sierânâs video nuuvt ete kovvejeijee koskâldit kamera vuorkkim tuše tiilij kuvvim kooskâst. Loppâpuáđusin láá kulmâ video. Ohtâ video pištá suulân 10–30 sekuntid. Juávhuin lii äigi 10 minuttid oovtâ video kuvviimân.

Videoh kovvejuvvojeh njuolgist editistemheiviittâsân teikâ kuvvimpiergâs koveráájun, mast videoh sirdojeh editistemheiviittâsân. Jis editistemheiviittâs ij lah kiävtust, te kovvejum tiilijd puáhtá oovdânpyehtiđ kuvvimpiergâs koveráájust.

Huám! Uáppeeh pyehtih molsođ roolâid tiilij kuvvim ohtâvuođâst, vâi puohah, kiäh halijdeh, peesih kuvviđ já čaittâliđ. Puoh tiilijn, maid lii kuvvim tiätu juávkku, ferttee leđe siämmáš tobdo. Jyehi videost pyehtih leđe 1–3 čaittâleijee.

4. Keččâm (15 minuttid)

Pargopáájá loopâst mij keččâp puátusijd oovtâst ubâ luokkain. Ton ohtâvuođâst uáppeeh ferttejeh ervidiđ já čielgiđ:

• Mii tobdoid lii koččâmušâst?
• Moh tobdomeerhâid kávnojeh videost ton toobdon?
• Mii jieškote-uvlágánijn tiilijn tábáhtuvá?