Jieijâs uuđâs

Pargovyehi: uccâ juávhoin
Pištem: 90 minuttid
Luokah: 0.–6.

Taan hárjuttâsâst ráhtojeh suulân kyevti miinut uđâsvideoh väljejum teemain. Uđđâseh pyehtih kieđâvuššâđ ovdâmerkkân äigikyevdilis tábáhtusâid, historjálijd tábáhtusâid teikâ aašijd, moh láá uáppeid teháliih teikâ moid uáppeeh halijdiččii vaiguttiđ.

Ulmeh:

• uápásmuđ TV-uđđâsij jiešvuođáid já olgospyehtimân
• oppâđ valjiđ uđâsteema uđâskriterij vuáđuld
• oppâđ muštâliđ väljejum teemast uđâshäämist
• oppâđ sahhiittâllâđ ulmuid já koijâdiđ sist tärkkilistee koččâmušâid
• oppâđ videokuvvim- já editistemtááiđuid
• hárjuttâllâđ juávkkupargo já finniđ hárjánem tast, maht uđđâseh ráhtojeh

Tarbâšeh:

• jyehi uccâ juávkun tablet teikâ eres viättupiergâs, mast láá kamera já videoeditistemheiviittâs (ovdâmerkkân iMovie teikâ FilmoraGo)
• printtejum Párnái uđđâseh -vuávámluámáttâh jyehi uccâ juávkun.

Onnâ: Jis tun lasettah Párnái uđđâsij algâ- já loppâtubdâlduv uđđâsáid videoeditistemheiviittâssáin, te tun finniih áámmátlub uđâsvuolgâttâs. Algâ- já loppâtubdâlduv tun puávtáh luođiđ jieijâd piergâsân täst. Jis kevttimnáál lii ruánáá käägis, te tun puávtáh keččâliđ meiddei ruánááseinikuvvim, tegu taan ovdâmeerhâst.

---

Pargopitá mudoh

1. Uáppeeh uápásmuveh TV-uđđâsáid já toi ráhtusân. Ovdâmerkkân puáhtá keččâđ Helsingin Sanomai Párnái uđđâsijd (suomâkielân), sämikielâlijd uđđâsijd Oddasat teikâ Valve elleekoveškoovlâ Párnái uđđâsijd (suomâkielân). Videoid kejâdijnâd toollâđ tyellitälli puudâ já savâstâllâđ uđâsvuolgâttâs ráhtusist: uđâsaŋkkur joođeet vuolgâttâs studiost => toimâtteijee insert tábáhtussaajeest (siskeeld toimâtteijee jođettem, sahhiittâllâm já kove) => uđâsaŋkkur joođeet vuolgâttâs studiost.
2. Teemah väljejuvvojeh. Uáppeeh juáhhojeh uccâ juávhoid, já juávhui uđâsteemah meriduvvojeh jo-uv oovtâst teikâ uccâ juávhoin. Uđđâseh pyehtih kieđâvuššâđ om. äigikyevdilis tábáhtusâid, historjálijd tábáhtusâid teikâ aašijd, moh láá uáppeid teháliih teikâ moid uáppeeh halijdiččii vaiguttiđ. Pyeri uđâsteema tiävdá aainâs-uv oovtâ čuávuváin uđâskriterijn: äigikyevdilvuotâ, merhâšitteevuotâ, vijđesvuotâ, spiekâstâhlâšvuotâ, páihálâšvuotâ já mielâkiddiivâšvuotâ keččei čoolmijn.
3. Vuáváđ uđđâs luámáttâhân já kuárus pápárân nuuvt ete uđđâsist lii čuávuvâš rááhtus:
   •   uđâsaŋkkur oovdânpuáhtá uđđâs “studiost”
   •   toimâtteijee sahhiittâl já čuávu tábáhtusâid tábáhtussaajeest
   •   loopâst uđâsaŋkkur loopât vuolgâttâs.
4. Jyehiđ roolâid: uđâsaŋkkur, toimâtteijee, kovvejeijee já olmooš, kiäm ferttee sahhiittâllâđ. Siämmáá roolâst pyehtih leđe maaŋgah-uv uásálisteeh.
5. Roolâid já sahâvuáruid kannat hárjuttâllâđ ovdil kuvvim.
6. Kuvviđ uđđâsijd. Mušteđ sárnuđ tuárvi korrâsávt.
7. Editistiđ uđđâsijd. Čuoppâđ kovvejum materiaal editistemheiviittâssáin nuuvt ete tast šadda suulân 2 miinut kukke já tot siskeeld puoh tehálumos já mielâkiddiivumos oosijd iberdettee oornigist. Ađai keččeid ij taarbâš čäittiđ puoh koččâmušâid já vástádâsâid. Meridiđ tom, mii lii tehálâš.
8. Mij keččâp valmâš uđđâsijd oovtâst já savâstâllâp tain.