Lihâdeijee kove illuusio já animaatio

Taan pargopittáást uáppee uápásmuvá lihâdeijee kove illuusion ađai toos, maht maŋaluvâi čaittum kuuvijn šadda mielâkove liihâdmist. Taat lii puoh elleekuuvij vuáđu. Pargopittá siskeeld kyehti oovtâkiärdánis animaatiohárjuttâs: vistig kyevti sárgusist šaddee rullâanimaatio já talle moobiilpiergâsáin kovvejum tiŋgâanimaatio, mast tiiŋgah liihâdškyeteh ”jiešmeidlist”.

Ulmeh:

oppâđ Stop Motion -animaatio toimâprinsiip
tarkkuđ lihâdeijee kove illuusio já iberdiđ, maht lihâdem šadda kooveest nuubán
oppâđ kevttiđ teknologia jieijâs kreatiivlii olgospyehtimân
pyevtittiđ uánihis animaatiopitá jieškote-uvlágánij materiaalijguin
oppâđ kyevt- já kuulmâuulâtlii kovehammim
ovdediđ juávkkupargotááiđuid

Tarbâšeh:

Rullâanimaatiohárjuttâsân: A4-päävir, peenah já skerreeh.
Tiŋgâanimaatiohárjuttâsân: tablet, viättupuhelin teikâ mottoom eres kuvvimpiergâs, mast lii Stop Motion -heiviittâs (tegu mávsuttes Stop Motion Studio -heiviittâs).

1. Rullâanimaatio rähtim

Pargovyehi: ohtuunis pargo
Pištem: 20 minuttid
Luokah: 0.–9.

Algâpargon tun puávtáh keččâđ Valve elleekoveškoovlâ almostittem Animaatio raavâkirje, uási 1: Lihâstâs illuusio já rullâanimaatio rähtim -máttááttâsvideo, mii pištá 4 miinut.

Rullâanimaatio vuáđujuurdân lii tot, et maŋaluvâi čaittum kuuvijn šadda mielâkove liihâdmist

1. Čuopâ vielgis A4-pápárist nelji stiellâs (oovtâ stiellâs alodâh 7 cm, kobdodâh 21 cm).
2. Vääldi oovtâ stiellâs. Tuáji tom nuuvt ete tast šadda vihko (alodâh 7 cm, kobdodâh 10,5 cm).
3. Leehâst vihko. Sáárgu mottoom huáđđoo, ovdâmerkkân ulmuu teikâ ellee, koskâlehâstuv uálgispiälálii siijđo kooskân.
4. Toppâl vihko. Kove, mon tun lah eidu sárgum, uáinoo siävŋusávt ovdâsiijđo čoođâ. Sáárgu kove ovdâsiijđon (siämmáá sajan) nuuvt ete kooveest lii tábáhtum miinii nubástusâid.
5. Kiesâ ovdâsiijđo čovgâdávt rullân peenâ pirrâ aaibâs siijđo sisroobdâ räi (juurât peenâ čižetpel kiesâdijnâd).
6. Toolâ vihko ton čižetroobdâst sajestis peevdi alne já liihât nubbijn kieđáin ruulâ siste leijee peenâ jotelávt ovdâsmaŋas uálgispel já čižetpel. Ovdâsijđo vuáruluvâi uáinoo já ij oinuu. Keččâl jieškote-uvlágánijd liävtuid.
7. Lasseet elementijd kován teikâ ivnii kuuvijd.

2. Tiŋgâanimaatio rähtim

Pargovyehi: uccâ juávhoin
Pištem: 70 minuttid
Luokah: 0.–9.

Algâpargon tun puávtáh keččâđ Valve elleekoveškoovlâ almostittem Animaatio raavâkirje, uási 2: Jieškote-uvlágáneh animaatiotekniikeh -máttááttâsvideo, mii pištá 4 miinut.

Tiŋgâanimaatiost kovvejuvvojeh tiiŋgah jieškote-uvlágánijn stiäluin. Ko kuuvijd kiäččá jotelávt maŋaluvâi, te tiiŋgah oroh liihâdmin jiešmeidlist.

1. Valjiđ kyehti tiiŋgâ, maid tij haalijdvetteđ lihâttiđ (om. peenâ já kumi).
2. Keksiđ tom, mii tábáhtuvá, ko tiiŋgah kuáhtájeh.
3. Kuvvimpiergâs ferttiiččij pissoođ sajestis talle ko animaatio kovvejuvvoo. Pieijâđ tablet (teikâ eres kuvvimpiergâs) steligân teikâ mudoi ciäggud peevdi teikâ lättee oolâ.
4. Starttađ tablet Stop Motion -animaatioheiviittâs já rähtiđ uđđâ proojeekt.
5. Pieijâđ tiiŋgâid kove roobdâi oolâ nuuvt ete toh iä vala oinuu.
6. Lihâttiđ tiiŋgâid suulân 0,5 cm häävild, väldiđ kove já kiärduđ taam ton räi ko tiiŋgah láá kuáhtám já miinii lii tábáhtum. Smiettâđ, maht tiiŋgâid finnee lihâdiđ njuolgist, maht toh nimmurdeh, lihâdeh jotelubbooht teikâ hitoh.
7. Keččâđ animaatioid. Tij pyehtivetteđ mutteđ koveliävtu animaatioheiviittâs asâttâsâi peht. 6–7 kovveed sekuntist lii táválávt hiäivulâš liähtu.