Elleekove magia: Stop Trick
Pargovyehi: uccâ juávhoin
Pištem: 90 minuttid
Luokah: 3.–9.
Taan pargopittáást uáppee piäsá keččâliđ illuusio. Tot lii puáris elleekovetekniik, mon vievâst kovvejum tiiŋgâ teikâ ulmuu finnee lappuđ, itteeđ teikâ muttuđ ereslágánin. Illuusio toovâi tobdosin tuotâvuođâ manipulistee mainâstemvuovij pälgisliäkkoo, ranskalâš Georges Méliès 1800- já 1900-luuvij jorgálduvâst.
Ulmeh:
- iberdiđ pyerebeht elleekove historjá já ovdánem
- iberdiđ elleekove máhđulâšvuođâid tuotâvuođâ manupulistmist
- vuáváđ jieijâs elleekove keččei reaktioi vuáđuld
- oppâđ videokuvvim já -editistem
Tarbâšeh:
- jyehi uccâ juávkun tablet teikâ eres viättupiergâs, mast láá kamera já videoeditistemheiviittâs (ovdâmerkkân iMovie teikâ FilmoraGo). Vuálááš viättupiergâsân avžuuttuvvoo, mut tot ij lah págulâš.
Pargopitá mudoh
Čuávuvâžžân láá Stop Trick -ovdâmeerhah:
- Keksiđ uánihis kuáhtám teikâ tile, mast tiŋgâ teikâ olmooš láppoo, itá teikâ muttoo ereslágánin. Ovdâmerkkân: olmooš čokkáán stoovlin, mut stovli láppoo eidu ovdil tom.
- Pieijâđ viättupiergâs vuálážân teikâ om. peevdi vuástá, vâi tot pisoččij sajestis.
- Hárjuttâllâđ porgâmáin muddoid 4–7 taid vuorkkiihánnáá. Tastmaŋa porgâđ siämmáid muddoid uđđâsist, já taan tove vuorkkiđ taid.
- Kovvejeijee addel čaittâleijeid algâttâsmeerhâ etâmáin ”JORÁ!”, já sun kuvviiškuát tállán ton maŋa. Mii ovdâmeerhâst tile kovvejuvvoo ton räi ko olmooš lii eidu čokkáánmin stoovlin. Talle kovvejeijee koskâldut kuvvim já čyervee ”STOP!”, já čaittâleijee ferttee pissoođ sajestis liihâdhánnáá.
- Tääl kován lasettuvvoo miinii teikâ tast miinii váldoo meddâl. Ovdâmerkkâtiileest išedeijee váldá várugávt stoovli meddâl čaittâleijee vyelni.
- Ko tile puáhtá oppeet jotkuđ, te kovvejeijee iätá ”JORÁ!” já kuvviiškuát uđđâsist.
- Čaittâleijee ”koccáá” já juátká tile tast, moos tot paasij. Ovdâmerkkâtiileest olmooš čokkáán ”ááimu oolâ”. Čaittâleijee reagist hiäivulijn naalijn.
- Ko tij leppeđ kuvvim puoh pittáid, te pieijâđ taid tastoo editistemheiviittâsân (om. iMovie) maŋaluvâi. Jis heiviittâs ráhtá ristâkovesiirdâšmijd pitái kooskân, te meddâlistiđ taid. Pittáást nuubán sirdâšuumân kiävttoo njuolgâ čuoppâm.
- Uánidiđ pittáid toi aalgâst já loopâst, vâi triiki äigidem šodâččij pyerebin.
- Meddâlistiđ pitái algâalgâlijd jienâid.
- Lasettiđ muusik já jienâpiähtusijd sehe algâ- já loppâteevstâid.
- Mij keččâp valmâš videoid oovtâst.
P.S. Lase älkkees elleekovetriikih kávnojeh Škoovlâi elleekoveoho siijđoin (suomâkielân).
