StalluBoy’s Adventure
StalluBoy’s adventure -filmma dieđut
Bagadalli: Niki Rasmus
Riika: Suopma
Jahki: 2016
Guhkkodat: 6:19 min
Šládjatiipa: Animašuvdna
Buvttadeapmi: Sámi oahpahusguovddáš
Mii ávžžuhit: 2.–6.lk
Giella: Davvisámegiella, anárašgiella ja nuortalašgiella. Tekstejuvvon suomagillii, davvisámegillii, ja anárašgillii.
Filmma sáhttá geahččat doaisttážii
Filmmas fearániid vásihit sámi mytologiijas oahpes heakkalaččat: gufihtar, noaidi, čáhcerávga ja stállu. Mii dáhpáhuvvá, go stálu mánná ii hálitge eallit stáluid árbevieruid mielde ja gufihtar lea dolkan eatnanvuloš eallimii?
Animašuvnnas gullat buot Suomas hubmojuvvon sámegiela: Gufihtar ja čáhcerávga sárdnuba anárašgiela, noaidi máinnasta nuortalašgiela ja stálloáhčči ja -bárdni fas hupmaba davvisámegiela.
Oahpaheaddjái: sámi mytologiijai sáhttá oahpásnuvvat omd. Sámi kultuvrra diehtosátnegirjjis: Sisdoallu: Árbevirolaš vuoiŋŋalašvuohta ja njálmmálaš árbevierru (suomagillii Perinteinen hengellisyys ja suullinen perinne – Sámi kultuvrra diehtosátnegirji: (saamelaisensyklopedia.fi)
Bargobihtát:
1) Ságastanbargobihttá
Mii filmmas dáhpáhuvvá? Dáhpáhuvvágo das juoga heahkas?
2) Ságastanbargobihttá
Leatgo animašuvnna heakkalaččat oahppásat ovddalgihtii dahje muittuhitgo dat juoga heakkalačča, man birra leat gullan dahje lohkan ovdal? Mat dain leat oahppásat dahje maid dat muittuhit? Jos heakkalaččat leat ođđasat, de maid don ohppet daid birra? Jos dat leat oahppásat, de leigo daid láhttemis juoga eará go máidnasiin, maid leat gullan dahje lohkan ovdal?
3) Sárgun
- Vállje ovtta heakkalačča animašuvnnas: stállobárdni, stálloáhčči, gufihtar, čáhcerávga dahje noaidi. Mat iešvuođat báhce du millii dán heakkalaččas? Sárggo heakkalačča ja čále gova vulobeallái sáni, mii du mielas muittuha dán heakkalačča.
- Dutket sárgosiid ovttas. Galle iešguđege heakkalačča sárgguidet? Maid iešvuođaid attiidet daidda?
- Ságastehket: manin válljejit aiddo dán heakkalačča?
4) Párra- dahje joavkobargu
- Válljejehket filmmas ovtta dáhpáhusa, mii balddii/boagustahtii/imaštahtii dahje bovttii eará dovdduid.
- Sárgot dan távvalii/báhpárii dahje čájehallet dan pantomiiman. Earát árvidit, mii dát dáhpáhusaid lea.
- Ságastehket, mii dán dáhpáhusas balddii/boagustahtii/imaštahtii dahje bovttii eará dovdduid. Maid iešguđege dovdduid filbma bovttii?
Oahpásnuva lihkadeaddji gova illušuvdna ja animašuvdna -bargobádjái dán liŋkkas: Lihkadeaddji gova illušuvdna, animašuvdna – Elokuvaviikko
Rávvagiid filbmaanalysii fállá maiddái Koulukino Čoavdagat filbmii -diehtogihpa: ČOAVDAGAT FILBMII – Avaimia elokuvaan pohjoissaameksi – Koulukino
Bargobihtáid lea ráhkadan FM Henna Aikio
