Filmma magiija: Stop Trick

Bargovuohki: smávvajoavkkuin
Guhkkodat: 90 min
Luohkát: 3.–9.

Dan bargobihtás iskat árra filbmagoanstta, illušuvnna. Dainna govvejuvvon dávvir dahje olmmoš jávkaduvvo, iđista dahje molsašuvvá nubbin. Goanstta dagai dovddusin frankriikalaš Georges Méliès,1800- ja 1900-loguid molsumis, guhte manipulerii duohtamáilmmi muitalanvugiid.

Ulbmilat:

• lasihit áddejumi filmma historjjá ja ovdáneami birra
• áddet filmma vejolašvuođaid duohtamáilmmi manipulerejeaddjin
• plánet iežas filmma ja váldit vuhtii vuostáiváldiid reakšuvnnaid
• oahppat videogovvema ja -editerema

Maid dárbbašat:

• juohke smávvajovkui neahtuš dahje eará fiehttorusttet, mas lea kámera ja videoediterenheivehus (ovdamearkka dihte iMovie dahje FilmoraGo). Ávžžuhit geavahit statiivva fiehttorusttegiin, muhto dat ii leat bákkolaš.

---

 Bargomuttut:

Sáhttibehtet geahččat ovdamearkkaid vulobealde (stop tricks):

1. Hutket oanehis dáhpáhusa dahje dilálašvuođa, mas dávvir dahje olmmoš jávká, iđista dahje molsašuvvá nubbin. Ovdamearka: olmmoš čohkána stullui, muhto stuollu jávká ovdal čohkáneami.
2. Stellejehket fiehttorusttega statiivii dahje beavddi vuostá, vai dat bissu stáđisin.
3. Hárjehallet dilálašvuođa muttuid 4–7 bokte govvema haga. Dán maŋŋel dahket seamma muttuid, nu ahte govvebehtet.
4. Govvejeaddji addá neavttáriidda álggahanmearkka ja čurve “GOVVE!”, ja álggaha dan maŋŋel govvema. Ovdamearkadilálašvuođas govvet dassážii, go olmmoš lea aiddo čohkáneame stullui. Dasto govvejeaddji bisseha kámera ja čurve “STOP!”, ja dalle neavttár ferte stirdut dán čohkáneami posišuvdnii.
5. Dál govvii lasihit dahje das váldit juoidá eret. Ovdamearkadilálašvuođas veahkki viežžá várrugasat stuolu eret neavttára vuolde.
6. Go dilálašvuohta lea gearggus joatkašuvvat, de govvejeaddji čurve “GOVVE!”, ja deaddila dan maŋŋel báddenboalu.
7. Neavttár ”ealáska” ja joatká das, masa bázii. Ovdamearkadilálašvuođas son ráškkiha láhttái. Neavttár reagere dilálašvuhtii vuogas vugiin.
8. Go lehpet govven buot dilálašvuođaid, de buktilehket govvengerddiid editerenheivehussii (omd. iMovie) ja lasihehket daid editerenheivehussii rivttes ortnegii. Jos heivehus dahká govvengerddiid gaskii ruossalasgovvasirdašumiid, sihkkot daid eret; govvengearddis nubbái sirdašuvvan dáhpáhuvvá njuolggočuohppamiin.
9. Buoridehket video áigemeroštallamiid, nu ahte oanidehpet govvengerddiid daid álggus ja loahpas.
10. Jávohuhttet govvengerddiid álgojienaid.
11. Lasihehket musihka ja jietnaeffeavttaid ja álgo- ja loahppateavsttaid.
12. Geahččat gárvves videoid ovttas.

P.S. Eanet álkes filbmabihtážiid gávnnat Skuvllaid filbmavahku siidduin (suomagillii).