Lihkadeaddji gova illušuvdna, animašuvdna

Dán bargobihtás oahpásmuvvat lihkadeaddji gova illušuvdnii dahjege dasa, mo maŋŋálagaid čájehuvvon govat riegádahttet miellagova lihkastagas. Dát lea filmma vuođđu. Dahkkot guokte oktageardánis animašuvdnahárjehusa: vuosttažin guovtti sárgojuvvon gova bokte riegádeaddji rullaanimašuvnna ja nubbin mobiilarusttegiin govvejuvvon dávviranimašuvnna, mas dávvirat ožžot heakka.

Ulbmilat:

• oahppat stop motion -animašuvnna doaibmanprinsihpa
• geahčadit lihkadeaddji gova illušuvnna ja áddet, mo lihkadeaddji govva huksejuvvo govva háválassii
• oahppat geavahit teknologiija iežas kreatiiva ovdanbuktimii
• buvttadit oanehis animerejuvvon dáhpáhusa, mas geavaha iešguđegelágan materiálaid
• oahppat guovtte- ja golmmaolat gova áiccadeami
• ovddidit joavkobargodáidduid

Maid dárbbašat:

• Rullaanimašuvdnahárjehussii A4-báhpára, bliánttaid ja skieraid.
• Dávviranimašuvdnahárjehussii nehtoža (pad), mas stop motion -heivehus (nu mo nuvttá Stop Motion Studio -heivehus), fiehttotelefovnna dahje eará govvenrusttega.

---

1. Rullaanimašuvnna ráhkadeapmi

Bargovuohki: ovttaskas oahppi bargu
Guhkkodat: 20 min
Luohkát: 0.–9.

Láidehussan sáhtát geahččat Valve filbmaskuvlla Animašuvdnarávvagat, oassi 1: Lihkastaga illušuvdna ja rullaanimašuvnna ráhkadeapmi -oahpahusfilmmaža. Guhkkodat 4 min.

Rullaanimašuvdna riegáda guovtti sárgojuvvon govas. Go daid čájeha maŋálgihtii, de riegáda illušuvdna lihkastagas.

1. Čuohpa vilges A4-báhpáris njeallje bihtá (ovtta allodat 7 cm, govdodat 21 cm).
2. Váldde ovtta bihtá. Máhco dan gasku, nu ahte šaddá gihpa (allodat 7 cm, govdodat 10,5 cm).
3. Raba gihppaga. Sárggo guovdu olgeš siiddu juoga figuvrra, ovdamearkka dihte ealli dahje olbmo.
4. Govčča gihppaga. Govva, man eske sárgot, vuhtto ovdasiiddu čađa. Sárggo ovdasiidui gova seamma sadjái, nu ahte das lea juoga nuppástuvvan.
5. Rulle ovdasiiddu čavga bliántta birra sisravdda rádjái (rulle bliántta gurutguvlui go ráhkadat rulla).
6. Doala gihppaga sajis dan gurutravddas ja nuppiin gieđain rulle johtilit ovddosmaŋos gurut- ja olgešguvlui bliántta, mii lea gihppaga siste. Dalle ovdasiidu vuoruid mielde oidno ja ii oidno. Iskka jođánit ja hihtáseappot.
7. Lasit govvii elemeanttaid dahje ivdne govaid.

2. Dávviranimašuvnna ráhkadeapmi

Bargovuohki: smávvajoavkkuin
Guhkkodat: 70 min
Luohkát: 0.–9.

Láidehussan sáhtát geahččat Valve filbmaskuvlla Animašuvdnarávvagat, oassi 2: Iešguđegelágan animašuvdnateknihkat -oahpahusfilmmaža. Guhkkodat 7 min.

Dávviranimašuvnnas govvet dávviriid iešguđet posišuvnnas. Go govaid geahčadit jođánit maŋŋálagaid, de dávvirat orrot lihkadeame iešalddis.

1. Válljejehket guokte dávvira, maid lihkahallabehtet (omd. bliántta ja gumme).
2. Hutket, mii dáhpáhuvvá, go dávvirat deaivvadit.
3. Animašuvnna govvedettiin govvenrusttet galggalii leat stáđis ja orrut sajis. Bija nehtoža (pad) (dahje eará rusttega, mainna govvebehtet) stellegii dahje doarjjo dan muđui ceaggut beavddi ala dahje láhttái.
4. Bidjet johtui nehtoža stop motion -animašuvdnaheivehusa ja ráhkadehket ođđa prošeavtta.
5. Stellejehket dávviriid gova ravddaide, nu ahte dat eai vel oidno.
6. Lihkahallet dávviriid sullii 0,5 cm hávil, coahkkalehket gova ja geardduhehket dán dassážii, go dávvirat leat deaivvadan ja juoga dáhpáhuvvan. Smihttet, mo dávvirat johtet njuolgga, mo mohkohalli, mo daid johtin jođálmuvvá dahje njoahcu.
7. Gehččet animašuvnnaid. Sáhttibehtet muddet govvaleavttu animašuvdnaheivehusa merrenboaluin. 6–7 gova sekunddas lea dávjá vuogas leaktu.