Tobddmõš-silttõstuâjjpääʹjj: tuʹlǩǩed da tobdškuäʹđ tobddmõõžžid

Tuâjjnääʹll: siõmjooukin
Peštt: 90 min
Klaass: 3.–6.

Tän tuâjast mij sniimmâp siõmjooukin videoid, koin kolmmân jeeʹres šõddmõõžžâst čuäʹjtep oummu, kååʹtt lij õõut tobddmõõžž viõǥǥâst. Tåʹbdde-a jeärraz, mii tobddmõõžžid tõt lij? Muʹvddem tobddmõõžž miârkid tij kaunnveʹted?

Täävtõõzz:

• tobddmõõžži vuâmmšummuš da fiʹttõõzzi ǩiõttʼtõõllmõš kreevsõs tuej diõtt
• tobddâd da tuʹlǩǩeed jiijjâs da jeärrsi tobddmõõžžid di mainsted tõin
• sosiaalʼlânji jeeʹres oummivuiʹm åårrmõš da vuârrvaikktemvuõʹjji haʹrjjtõõllmõš
• tuʹmmjed da ärvstõõllâd jiijjâs tuâj da mättjummuž

Neävv, koid taarbšep:

• tableeʹtt, jeäʹrmmteʹlfoon leʹbe jeeʹres sniimmâmneävv juõʹǩǩ siõmjouʹǩǩe. Lij pueʹrab ââʹnned jeäʹrmmaparaattâst videoeditâʹsttemsuåvldõõzz, mâʹte iMovie leʹbe FilmoraGo.

---

Tuâj poodd

1. Valmštummuš da paakkõõttmõš (20 min)

1. Ǩeeʹrjtep taaul ool škooulniiʹǩǩi hoʹhssjem tobddmõõžži liist.
2. Ǩeeʹrjtep taaul ool škooulniiʹǩǩi hoʹhssjem veeʹrbi leʹbe tuejjeemsaaʹni liist.
3. Vaʹlljeep taaul âʹlnn õõut tobddmõõžž da õõut veeʹrb. Čuäjtõõllâp vuäʹnkõs šõddmõõžž siõmjooukâst leʹbe obb klaassin. Ouddmiârkkân: Vaʹlljeep peʹccel tobddmõššân da poorrâd veʹrbben. Teä čuäjtõõllâp šõddmõõžž: Mäʹhtt peʹcclaž ooumaž påårr? Tuejjeep haʹrjjtõõzz oʹđđest jeeʹres tobddmõõžživuiʹm da veeʹrbivuiʹm.

2. Plaan tuejjummuš (20 min)

Jueʹǩǩep klaass 4-6 škooulneeʹǩǩ siõmjooukid. Juõʹǩǩ siõmjoukk vaʹlljad õõut tobddmõõžž jiõccses. Tän ool vaʹlljeep kooum veeʹrb. Õhtteep tobddmõõžž da veeʹrb mäʹhtt-kõõččmõõžžin: mäʹhtt vaʹlljuum aaʹššid tuejjad ooumaž, kååʹtt lij vaʹlljuum tobddmõõžž viõǥǥâst.

Ouddmiârkk: Siõmjoukk vaʹlljad tobddmõššân peʹccel da veʹrbben väʹʒʒed, mainsted di njälggsid vuäʹstted. Täi pirr hoʹhssjep koumm kõõččmõõžž:

• Mäʹhtt peʹcclaž ooumaž väʒʒ?
• Mäʹhtt peʹcclaž ooumaž maainast?
• Mäʹhtt peʹcclaž ooumaž vuästt njälggsid?

3. Sniimmʼmõõžž (30 min)

Juõʹǩǩ kõõččmõõžž sniimmâp jiijjâs videon õõutin välddõõzzin, leʹbe sniimmʼmõõžž årstâʹtte pâi jeeʹres šõddmõõžži kõõskâst. Looppâst lie kolmm video. Õhtt video peštt nuʹtt 10–30 sekuunt. Siõmjooukin lij nuʹtt 10 minuutt tuejjeed õõut video.

Sniimmâp videoid vuõiʹǧǧest editâʹsttemsuåvldõõzz äiʹǧǧraiddu. Nuʹbb vaajtõsmäinn lij sniimmâd sniimmâmneävv videoǩiiʹrjid, koin viikkâp videoid editâʹsttemsuåvldõʹsse. Jõs ij leäkku editâʹsttemsuåvldõs âânnmõõžžâst, vuäitt čuäʹjted snimmum šõddmõõžžid sniimmâmneävv videoǩiiʹrjin.

Hoʹhsse! Škooulneeʹǩǩ vuäiʹtte vaajted roolid jeeʹres aaʹšši sniimmâm poodd, što puk, kook haaʹlee, peäʹsse sniimmâd da čuäjtõõllâd. Seämma tobddmõš âlgg leeʹd siõmjoouk pukin sniimmʼmõõžžin. Vuäiʹtte leeʹd 1–3 čuäjtõõlli juõʹǩǩ videost.

4. Ǩiõččmõš (15 min)

Tuejjpääʹj looppâst ǩiõččâp tuejaid obb klaassin. Jurddjen lij, što ǩiõččmõõžž ääiʹj škooulneeʹǩǩ aʹrvvee da čiõlggee:

• Mii tobddmõõžžid-i täʹltte lij?
• Måkam tobddmõõžž miârk käunnʼje videost?
• Mäʹhtt ǩeävv juõʹǩǩ-aa šõddmõõžžâst?